Kaayyoo fi Akeekni Hiriira Boru PP waamtee maali?
Published July 17, 2026, 5:03 p.m. by FNN Staff
HIRIIRRI NAGAA BORUU: DEEGGARSA MOO? MORMII UUMMATAA DHOKSUUDHAA?
FNN. Adoolessa 17/2026. Waamichi Mootummaan Federaalaa hiriira nagaa boruuf dhiyeesse mootummaa biratti nageenya, tokkummaa fi marii biyyaalessaa cimsuuf jechuun kan ibsamu ta'us, yaadonni komii fi gaaffileen uummataa garuu hamma har'aatti deebii quubsaa argachuu isaanii irratti gaaffiin guddaan ka'aa jira.
Komiin uummanni naannolee garaagaraa irraa yeroo dheeraaf kaasaa ture keessaa qaala'iinsi jireenyaa, rakkoon nageenyaa, hojii dhabdummaa dargaggootaa, buqqaatummaa fi rakkoon mirga namoomaa keessaa muraasni isaanii dha.
Keessumaa Oromiyaa keessatti walitti bu'iinsi hidhannoo waggootaaf ture lubbuu namoota hedduu irratti miidhaa geessisuun isaa yeroo hedduu himamaa tureera.
Gaaffiin uummanni kaasaa jiru keessaa inni guddaan, mootummaa hiriira nagaa waamuun dura rakkoolee bu'uuraa uummataa kanaaf furmaata maalii qopheesse? kan jedhu dha. Uummanni tokko tokko nageenyi hiriiraan qofa osoo hin taane, hojii qabatamaan mirkanaa'uu qaba jedhu.
Kana malees, hirmaattonni marii biyyaalessaa fi hayyoonni siyaasaa gariin mariin biyyaalessaa mootummaa jalqabame qaamolee siyaasaa hunda hirmaachisuu qaba jechuun yaada isaanii ibsaa turaniiru. Mariin hirmaachisaa fi wal qixa ta'e qofa furmaata waaraa fiduu danda'a jechuun mootummaa irratti gaaffii kaasaniiru.
Gama biraatiin ammoo mootummaa deeggaraan hiriirri nagaa kun mootummaa tokko deeggaruu qofa osoo hin taane, nageenya biyyaa fi marii siyaasaa karaa nagaatiin furmaata barbaaduuf mootummaa fi uummata gidduutti waliigaltee uumuu keessatti gahee olaanaa qaba jedhaniiru.
Haa ta'u malee, yaadni uummataa tokko hunda irratti walii hin galu. Namoonni tokko tokko hiriirri kun sagalee uummataa mootummaa deeggaru agarsiisa jedhu yoo ta'u, kaan ammoo komiiwwan uummataa dhaggeeffachuun fi furuun hiriira kamiyyuu caalaa barbaachisaa dha jechuun falmu.
Gaaffiin har'a uummanni of gaafachaa jiru inni guddaan; hiriirri nagaa boru adeemsifamu kun komii uummataa dhaggeessisuuf karaa haaraa ni banuu? Moo mootummaa deeggaruuf qofa oola? kan jedhu dha.
Dhimma mootummaa, mormitootaa fi uummata gidduutti furmaanni waaraan kan argamu yoo sagaleen uummataa kabajamee, mariin hunda hammataa ta'ee fi nageenyi qabatamaan mirkanaa'e qofa akka ta'e hubachuun barbaachisaa dha.
Kanaaf, hiriirri nagaa boru adeemsifamu jechuun gaaffii fi komii uummataa dagachuun osoo hin taane, mootummaa fi uummata gidduutti wal amantaa haaromsuu fi furmaata waaraa barbaaduuf carraa ta'uu qaba.
Similar posts:
Letenaal Jeneraal Taaddasaa Warradaa Hidhaa Manaa Jala Jiraachuu Maatiin Isaanii Dubbatan.
Waltajjii Marii Biyyoolessaarratti karoorri Oromiyaa fiiguuf deemaa jiru akka hubatan hirmaattonni dubbatan.
Ummanni Oromoo Guddichi Gaanfa Afrikaa baga Irreeccha bara 2025 geessaan.
NATOn Raashiyaaf Deebii Kennuuf Adeemsa Ba'amuu Qabu Cimsaa Jira Jedhame.