Sudaan Kibbaatti namoonni miiliyoona saddeetitti dhiyaatan balaa beela hammaataaf saaxilamuuf jiru jechuun dhaabbileen miti - mootummaa akeekkachiisan
Published April 29, 2026, 2:21 p.m. by FNN Staff
ODUU FNN
Akka gabaasa Tokkummaa Mootummootaa (UN) Wiixata baheetti, Sudaan Kibbaa keessatti walitti bu’iinsaa fi buqqaatii dabalaa dhufuun rakkoo namoomaa duraan ture caalaatti hammaachiseera; kanaan walqabatee namoonni miiliyoona 7.8 ta’an balaa beela hammaataaf saaxilamaniiru. Gabaasni kun akka jedhutti, baatiiwwan dhufan keessatti lammiilee biyyattii keessaa dhibbeentaa 56% kan ta’an hanqina nyaataa hammaataatu isaan mudata jedhameera.
Dhaabbanni Nyaataa fi Qonnaa (FAO), Dhaabbanni Sagantaa Nyaata Addunyaa (WFP) fi Dhaabbanni Gargaarsa Daaimmanii Tokkummaa Mootummootaa (UNICEF) hawaasni addunyaa "miidhaa ofirra deebiisuuf hammaa ta’e" jedhanii ibsan kana ittisuuf tarkaanfii ariifachiisaa akka fudhatu waamicha dhiheessaniiru.
Gabaasichi akka nuffisiisutti, lakkoofsi daaimman ji’a ja’aa hanga waggaa shaniitti jiran kanneen hanqina nyaataa hammaataa (acute malnutrition) irra jiran baatiiwwan ja’an darban keessatti 100,000’n dabaluun waliigala miiliyoona 2.2 ga’eera.
Daaimman 700,000 ta’an balaa du’aa guddaa jala akka jiran tilmamameera.
Sudaan Kibbaa keessatti walitti bu’iinsa itti fufeen kan ka’e tajaajiloonni sirna nyaataa hedduun miidhamaniiru yookan cufamaniiru. Kunis namoota hanqina nyaataaf saaxilaman dabaleera. Karaa biraatiin, hanqinni dhiyeessii fi deeggarsa maallaqaa yaala lubbuu baraaru argachuuf danqaa uumeera.
Rakkoon namoomaa biyya addunyaa irratti quxisuu taate kana keessatti uumame walitti bu’iinsa gosaa, jijjiirama qilleensaa fi dhiibbaa waraana biyya ollaa Sudaan irraa dhufeen kan ka’e hammaachaa dhufe. Rakkoon dinagdee biyyattii mudate haalicha caalaatti hammeesseera; Sudaan Kibbaa ammas biyyoota addunyaa irraa hiyyeeyyii ta’an keessaa ishee tokkodha jechuun Aljaazeeraan gabaaseera.
Similar posts:
Baqattonni Itoophiyaa 65 Sa'uudiitti du'a eeggataa jiran birmannaa gaafatan
Pirezidaantiin bulchiinsa yeroo Tigraay kan mootummaan federaalaa yeroo aangoo bulchiinsa isaanii waggaa 1f dheeresseef kaleessa kaabinee isaanii walgahii waamanii waliin marii irra turan.
Haleellaa Matakkalitti raawwateen ''hojjattoonni qeeraa torba ajjeefamuu'' jiraattonni himan
Yuunaayitid Isteetis hariiroo dippilomaasii Eertiraa waliin qabdu haaromfachuuf xiinxalaa jirti jedhame.